Айтал Покровскай куорат култуура киинигэр айар үлэтин отчуоттуур дьоро киэһэтэ буолла

 

Саха төрүт култуурата, ускуустубата сайдарын туһугар дьаныардаахтык үлэлиир СӨ култууратын туйгуна, норуот маастара Николай Никитин – Айтал Покровскай куорат култуура киинигэр айар үлэтин отчуоттуур дьоро киэһэтэ буолла.

 

Айылҕаттан талааннаах, мындыр иистэнньэҥ Николай Никитин эр киһи сахалыы таҥаһын сөргүппүт биир тарбахха баттанар маастарынан биллэр. Кини билигин Кытыл – Дьуратааҕы култуура киинигэр, «Сайдыы» кулуупка дириэктэринэн үлэлии сылдьар.

 

«Кыра эрдэхпиттэн кэрэни кэрэхсии үөрэммит буоламмын, 2013 сыллаахха Арктическай култуура уонна ускуустуба үнүстүүтүгэр үөрэнэ киирбитим. Тарбаҕар талааннаах иистэнньэҥ аймах – хаан дьоммуттан бэриһиннэрбит буолан, дипломнай үлэбин сахалыы иискэ көмүскээбитим. Сахалыы иис кистэлэҥэр норуот маастара Татьяна Шишигинаҕа уһуйуллубутум. Оттон ымпыктаах-чымпыктаах, кыбытык оһуордаах-бичиктээх сахалыы таҥаска, ат симэҕин уустаан-ураннаан тигиигэ салайааччынан Светлана Петрова буолбута», — диэн Николай Никитин санаатын үллэстэр.

 

 

Кэнники уон сылга Николай араас сиэдэрэй сахалыы таҥастары, ат симэхтэрин уустаан-ураннаан тигэн, араас быыстапкаларга кыттан элбэх кыайыыны ситистэ. Саха төрүт таҥаһын Аан дойдутааҕы, Бүтүн Арассыыйатааҕы, өрөспүүбүлүкэтээҕи бэстибээллэргэ, куонкурустарга, чиэстээхтик кыттан лауреат, дипломант ааттарын ылаттаата.

 

Элбэх атас-доҕор дьонноох, үгүс былааннаах норуот маастарын айар киэһэтигэр Дьокуускай куораттан доҕотторо, ырыаһыттар, норуот маастардара, «Симэх1» национальнай киинэ эҕэрдэлээтилэр, сэмэй бэлэхтэрин туттартаатылар.

41
Примечания:Описание
1СимэхВ 1992 году при Центре культуры и искусства им А.Е. Кулаковского создаётся галерея «Симэх» в целях популяризации работ мастеров, возрождения традиций народных ремёсел.

Добавить комментарий

Ваш e-mail не будет опубликован. Обязательные поля помечены *