Айхаллан Айылгылаах түһүлгэ

Чурапчы улууһугар кулун тутар 17 күнүгэр республикаҕа соҕотох, баай уопуттаах «Ай» народнай студия тэрийиитинэн быйыл иккис төгүлүн «Айхаллан Айылгылаах түһүлгэ» диэн норуот маастарын күнэ буолан ааста.

Чурапчы улууһугар норуот уус-уран оҥоһуктарын сайдыыта бэйэтэ туспа суоллаах-иистээх. Дирин силистээх, философскай ис хоһоонноох, айар эйгэҕэ киэҥник биллибит норуот маастардара, ураты суоллаах-иистээх худуоһунньуктар, скульптордар, муоһунан кыһан оҥорооччулар төрөөн-үөскээн ааспыттара. Билигин даҕаны кэнэҕэс кэнчээри ыччаты үөрэтиигэ, өбүгэ үгэһин сайыннарыыга үлэлэһэллэр. Кэлиҥҥи кэккэ сыллар ситиһиилэриттэн көрдөххө тимири уһаарыы, болгуоттан быһах, хомус охсуу, бууктаах кытыылаах соннору, ат симэҕин тигии уонна сөрүө хатыытын курдук көрүҥнэринэн Чурапчы маастардара дьарыктаналлара көстөр.

Норуот маастарын күнүн чэрчитинэн Чурапчы улууһун нэһилиэктэрин икки ардыларыгар “Уран көстүү, мындыр толкуй” көрүү-быыстапка арыллыыта, “Өбүгэ сырдык тыына” эталоннай оҥоһуктар быыстапкаларын көрүү, «Чурапчы улууһугар уус-уран оҥоһук билиҥҥи туруга, сайдар кэскилэ” араас таһымнаах быыстапкаларга кыттыбыт норуот маастардара, нэһилиэктэр уран тарбахтаахтарын түмсүүтүн салайааччылара, норуот айымньытын дьиэлэрин директордара, дьаһалталар баһылыктара уонна улуус салалтатын уус-уран оҥоһуктарга координационнай Сэбиэтэ кыттыылаах аһаҕас кэпсэтии буолан ааста.

«Чурапчы улууһа (оройуона)» муниципальнай тэриллии баһылыгын социальнай боппуруостарга солбуйааччы Мария Филипповна Кронникова улууска уус-уран оҥоһук сайдыытыгар кылаатын иһин 50 тыһ. солк. гранынан «Күбэйэ» түмсүүнү, Сылан нэһилиэгэ, сал. Макарова К.В., 25 тыһ. солк. гранынан Чурапчы улууһун норуотун маастардара Попов Павел Константиновиһы уонна Иустинов Иван Николаевиһы наҕараадалаата.

Бу тэрээһиннэргэ ыҥырыылаах ыалдьыт буолан «Симэх» киин делегацията кыттыыны ылла. Яна Викторовна Игнатьева уран уустары, мандар маастардары бу бэлиэ күнүнэн эҕэрдэлээтэ уонна Саха Республикатыгар уус-уран оҥоһук сайдыытыгар кылаатын иһин Мария Петровна Иустиноваҕа «СР Норуот уус-уран оҥоһуктарын маастара» бэлиэ туттарда.

165

Добавить комментарий

Ваш адрес email не будет опубликован.