Кэрэни айар ветеран учуутал

Ущницкая Анисия Ивановна айар yлэтин быыстапката

Олоҕун 40 сылын оҕону иитиигэ — үөрэтиигэ анаабыт учуутал, СӨ үөрэҕириитин туйгуна, үс кыыс күн- күбэй ийэтэ, элбэх сиэн, хос сиэн эбээтэ,.Уус — Алдан улууһун норуотун маастара Анисия Ивановна Ушницкая уус — уран оҥоһуктарын быыстапката үлэлээбит Мүрү 1 нүөмэрдээх оскуолатыгар үөрэнээччилэр, учууталлар, оскуола үлэһиттэрин көрүүтүгэр- билиитигэр күн устата турда.

Анисия Ивановна 1984-1999 сылларга Мүрү орто оскуолатыгар алын сүһүөх кылаас учууталынан үлэлээбитэ. Кэргэнэ В.К.Ушницкай оройуоҥҥа партийнай салайар араас үлэлэргэ партия ханна ыытарынан үлэлээбитэ. Анисия Ивановна кэргэнин өйөөн, батыһа сылдьан үлэлээбитэ.

Сынньалаҥҥа тахсан баран бэйэтэ санаата сытар, дууһата тардыстар дьарыгынан — ииһинэн үлүһүйбүтэ. Бу үлэҕэ ылсыыта оҕо, эдэр эрдэҕиттэн иитиэхтээн сылдьыбыт баҕа санаатын олоххо киллэрии буолбута. Оскуолаҕа үөрэнэ сылдьан аан бастаан оччолорго мээнэ көстүбэт саҥа таҥас сыыһын ылан бэйэтигэр ырбаахы быстан тиктибитэ туоратынан халыйа баран кэҥээн тпхсыбытыттан бэйэтэ да соһуйбут.Эбиитин ийэтиттэн дьарылларым буолуо диэн иһигэр кутуйах хаампытын билигин да сонньуйа, күлэ ахтар. Ийэтэ барахсан кыыһын иистэнэр баҕатын хаҥыннарбат баҕаттан мөхпөтөх. Ити курдук иискэ бастакы дьиэ иһинээҕи сүрэхтэниитин ааспыт. Кэлин үөрэнэн, кэргэн тахсан, оҕо төрөтөн, дьиэ — уот, үлэ- хамнас бүппэт күннээҕи түбүгүттэн быыс булан ииһинэн улаханнык дьарыктамматах.

Эдэр сылдьан нууччалыы истииллээх остуол сабыыларын тикпит, ришельенан да үлэлэри оҥорбут. Ол гынан баран дууһам ордук сахалыы оһуорга сытар буолан, сахалыы таҥастары, этэрбэс билэлэрин тигэр буолбутум диэн кэпсиир. Сааһыран баран дьиэҕэ дьэ нус- хас олорон , иннэ — кыптыый тутан, араас сурунааллартан көрөн үөрэнэн, саҥаттан саҥа үлэлэри оҥорон киирэн барбыт.
Бу кэлиҥҥи 20 чэ сылга өбүгэ үгэһин утумнаан, бииртэн биир киһи хараҕар хатанар, эриэккэс тигиилээх, дьэрэкээн көстүүлээх үлэлэри айан таһаарда. Кини уран тарбахтарын сылааһынан угуттанан айыллан тахсыбыт үлэлэр улуустааҕы, өрөспүүбүлүкэтээҕи уус- уран оҥоһуктар көрүү быыстапкаларыгар ситиһиилээхтик кыттыбыттара.

2014 с. Өлтөх нэһилиэгэр Ил Түмэн 20 сылыгар аналлаах ыһыахха » Ат киэргэлин бастыҥ тигээччи » анал ааты ылбыта. 2016, 2017 сылларга Туймаада ыһыаҕар 11с.уонна 111с степеннээх дипломнарынан бэлиэтэммитэ. 2016 с.Яков Ефремов аатынан өрөспүүбүлүкэтээҕи » Кылтан кынаттанан, сиэлтэн ситимнэнэн » көрүү- күрэххэ » Дэйбиир » көрүҥэр 111с миэстэ буолбута .
Анисия Ивановна киэҥ туттар ситиһиитинэн — хоту дойду, Уһук Илин, Сибиир төрүт олохтоох омуктарын уус — уран оҥоһуктарын быыстапкаларыгар 3 с бочуоттаах миэстэни ылбытын ааттыыр. Маастар үлэлэрэ былырыын (2017с) Италияҕа аан дойдутааҕы быыстапкаҕа турбуттара.

Анисия Ивановна барыта алта толору ат симэҕин тикпит. Аны иккини оҥорор соруктаахпын диэн баран сэмэйдик мичээрдиир. Кини кыбытык тигиигэ араас үлэлэрэ, оҥорбут дэйбиирдэрэ, айан таһаарбыт оҥоһуктара бииртэн биир ураты тыыннаахтар, дьиктилэр, кэрэлэр.

Бу сыл кулун тутар ыйга СӨ норуот маастарын күнүгэр Дьокуускайга Анисия Ивановна Ушницкаяҕа » СӨ уус — уран оҥоһуктарын маастара» бэлиэтэ туттарылынна. Маннык ураты дьарыктаах ветеран учууталбытынан, сэмэй үлэһит киһинэн, саха Далбар хотунунан киэҥ туттабыт.

2018 с. «Мүрү саһарҕата» хаьыаттан

61

Добавить комментарий

Ваш e-mail не будет опубликован. Обязательные поля помечены *