Республиканский конкурс профессионального мастерства «Хамыйахтаах Кытыйа»
Кулун тутар 4–6 күннэригэр Россияҕа иитээччи уонна уһуйааччы, Саха сиригэр үлэ сылыгар анаммыт бүтүн Өрөспүүбүлүкэ үрдүнэн бэлиэтэнэр норуот маастарын күнүн чэрчитинэн саха норуотун маанылаах иһиттэрин кытыйаны, хамыйаҕы оһуордааһыҥҥа, чочуйууга көрүү–күрэх Өксөкүлээх Өлөксөй аатынан норуоттар доҕордоһууларын дьиэтигэр ыытылла турар.
Күрэххэ Мирнэйтэн, Сунтаартан, Тааттаттан, Мэҥэ–Хаҥаластан, Амматтан, Дьоккуускай куораттан барыта 10 кыттааччы кыттыыны ылаллар. Өрөспүүбүлүкэ норуотун маастардарын кытта, кэрэ аҥардар, кэлэр кэскилбит ыччаттар кытталлара кэрэхсэбиллээх. Бэлэм оҥоһуллубут кытыйалаах, хамыйахха оһуору анньан, оҕунуохтаан–арыылаан, силигин-ситэрэн, тупсаҕай гына оҥоруохтаахтар. Үс бастыҥ үлэлэр «Симэх» Национальнай Киин эталоннай оҥоһуктарын фондатыгар хараллыыга киириэхтэрэ. Бастыҥ үлэлэри анал Экспертнэй сэбиэт талыаҕа.
Тэрээһини Чороон уустарын Өрөспүүбүлүкэтээҕи общественнай түмсүүтүн салайааччыта, «Симэх» Национальнай Киин уус–уран оҥоһуктарын салаатын салайааччыта Дмитрий Осипов иилээн–саҕалаан ыытар. Саха маанылаах иһитин–хомуоһун туһунан лекцияны Ем.Ярославскай аатынан холбоһуктаах государственнай Түмэл реставратора Протопопов Василий Егорович ыытта.
Кулун тутар 5 күнүгэр конкурс үлэтин салҕыаҕа. 3 чаастан Саха Өрөспүүбүлүкэтин норуотун маастара Федор Чярин кытыйаны оҥорууга маастар–кылаас ыытара былааннанар.
Кулун тутар 6 күнүгэр 10 чаастан Өксөкүлээх Өлөксөй аатынан норуоттар доҕордоһууларын дьиэтигэр 321 хоско саха норуотун национальнай бырааһынньыгар ыһыахха туттуллар иһити-хомуоһу оҥоруу боппуруостарыгар аһаҕас кэпсэтии ыытыллыаҕа. 12 чаастан күрэх кыттыылаахтара бар дьон иннигэр оҥорбут кэрэ оҥоһуктарын көрдөрүөхтэрэ. Наҕараадалааһын буолуоҕа.
