Саха хараҕынан

Бу быыстапкаҕа Чурапчы улууһун уран тарбахтаахтара, уустара хас эмэ сыл үлэлээбит үлэлэрин дьон сэргэ көрүүтүгэр таһаардылар. Манна бааллар Николай Аржаков – Боло Уус, Изабелла Кузьмина — куукула оҥорооччу, Сардана Скрябина – туоһунан тигээччи, Оксана Филиппова – таҥас кырадаһынынан тигээччи, Агафья Никитина – саха таҥаһын, киэргэлин, малын-салын, тирииттэн оҥоһуктары тигээччи, Николай Дьячковский – кымыс иһиитигэр туттуллар иһити-хомуоһу оҥорооччу үлэлэрэ.

Быыстапкаҕа турбут оҥоһуктары барытын киһи хайгыы көрүөн сөп. Ол курдук, Николай Николаевич Аржаков – Боло-Уус, кыраайы үөрэтээччи, дэгиттэр уус саха номохторугар, үһүйээннэригэр олоҕуран айбыт хомустарын композицияларын, былыргы саха боотурун сэбин-сэбиргэлин: куйаҕы, батаһы, ох саалары, оноҕостору чинчийэн, онно тирэҕирэн оҥортообут үлэлэрэ турдулар.
Сардана Скрябина туостан тикпит сүктэр кыыс маллаах иһитэ киһи болҕомтотун тарта. Кини туос иһиккэ түһэрэр сахалыы ойуутун Мандар Уус альбомугар көрөр, онтон туһанар эбит. Олус ыраас, чопчу тигиилээҕин бэлиэтиэххэ сөп.

Изабелла Кузьмина оҥорбут бииртэн биир кэрэ куукулалара дьон болҕомтотун тартылар: “Таас Хотун”, “Баай Байанай”, “Күөх Боллох”, “Симэхсин эмээхсин” илэ-чахчы хамсаан барыах курдук оҥоһуллубуттар. Олус ис киирбэх сирэйдээхтэр-харахтаахтар, таҥастаахтар-саптаахтар.

Дизайнер-уруһуйдьут идэлээх Оксана Филиппова аныгылыы быһыылаах-таһаалаах, сахалыы ойуулаах-бичиктээх таҥастарын киһи эрэ көрүөх, таҥныах курдуктар.
Агафья Никитина саха далбар таҥаһын толору таҥнан туран оҥорбут үлэтин кэпсээбитэ туспа болҕомтону тарта. Кини бэйэтин өбүгэлэрин таҥастарын, чаппараактарын саҥардан тикпитэ эмиэ биир кэрэхсэбили үөскэттэ. Хоту дьон үлэтин, тигиитин туспатын көрдөрдө.

Николай Дьячковскай, кыһыны быһа муустаах ойбоҥҥо сотүөлээн республика дьонунун сөхтөрбүт киһи аны хатыҥ маһынан, удьурхайынан сахалыы иһити оҥоруунан дьарыктанарын көрдөрдө. Бэйэтэ эмиэ туспа ньымалардааҕын кэпсээтэ.

Бу курдук киһи билбэтэҕин билэр, сэргии көрөр оҥоһуктардаах маастардарга өссө ситиһиилэри, кытаанах доруобуйаны баҕарыаҕыҥ.
Быыстапка “Симэх1” галереяҕа олунньу ый 15 күнүгэр дылы дьон көрүүтүгэр туруо.

Екатерина Иванова

53
Примечания:Описание
1СимэхВ 1992 году при Центре культуры и искусства им А.Е. Кулаковского создаётся галерея «Симэх» в целях популяризации работ мастеров, возрождения традиций народных ремёсел.
CreativeMinds WordPress Plugin CM Footnotes

Добавить комментарий

Ваш e-mail не будет опубликован. Обязательные поля помечены *