Бүлүү улууһугар Уус кыһатын үөрүүлээх арыллыыта

Бүгүн ахсынньы 24 күнүгэр улууспутугар Уус Кыһатын аһыллыытын үөрүүлээх тэрээһинэ ыытылынна.

Уус кыһатын аһыллыыта Россия Президенэ Владимир Путин үүнэр 2022 сылы Российскай Федерацияҕа норуот искусствотын уонна культура нэһилиэстибэтин сылынан биллэрбитигэр дьүөрэлэспитэ ордук дьоһун суолталаах.

Уус кыһата саха балаҕаныгар аһылынна. Тэрээһиҥҥэ Саха Өрөспүүбүлүкэтин норуот уус-уран оҥоһуктарыгар искусствотын “СИМЭХ” национальнай Киинин делегацията кыттыыны ылла.

Делегация кыттыылаахтара СИМЭХ” национальнай Киинин сайдыыга салаатын салайааччыта Дмитрий Константинович Осипов, Саха Республикатын уус-уран оҥоһуктарын маастара Дмитрий Николаевич Колодезников, норуот иистэнньэҥэ, «Возрождение» общественнай холбоһук чилиэнэ Тамара Николаевна Жиркова, биир дойдулаахпыт Саха Өрөспүүбүлүкэтин норуотун маастара Зинаида Евсеевна Павлова улуус баһылыга С.Н. Винокуровы кытта көрүстүлэр.

Үөрүүлээх быһыыга Уус Кыһатын дьиэтин мэҥэ ааттаах дуоскатын арыйыыга кыттыыны ыллылар: Бүлүү улууһун дьаһалтатын дьыалатын салайааччыта Клара Валерьяновна Гаврильева, Саха Өрөспүүбүлүкэтин “СИМЭХ” норуот уус-уран оҥоһуктарыгар искусствотын “СИМЭХ” национальнай Киинин сайдыыга салаатын салайааччыта Дмитрий Константинович Осипов, Бүлүү улууһун култуура сайдыытын уонна норуот айымньытын оройуоннааҕы Киинин салайааччытыгар Алена Александровна Дашевская, Саха Республикатын норуотун маастара Анна Николаевна Семенова.

Уус Кыһата аһыллыытыгар Алгыс сиэрин-туомун оҥордо Саха Өрөспүүбүлүкэтин култууратын туйгуна Владимир Спиридонович Николаев-Тоорукча. Ыалдьыттары айыы далбар аһынан арыылаах алаадьынан, сүрэҕи-быары сөрүүкэтэр кырылыы кыынньар кымыһынан айах тутан күндүлээтилэр.

Норуот үрүҥ көмүс сүүтүктээх, имигэс илиилээх иистэнньэҥнэргэ, тимири ыллатар, маһы саҥардар уран уустарга Улуус, култуура уонна Бүлүү улууһун «Өбүгэ утума» олохтоох общественнай тэрилтэ аатыттан наҕараадалар, эҕэрдэ суруктар, туттарылыннылар.

“СИМЭХ” национальнай Киин сайдыыга салаатын салайааччыта Дмитрий Константинович Осипов өр сыллаах айымньылаах норуот үгэстэрин үйэтитиигэ үлэтин иһин «Саха Республикатын норуотун уус-уран оҥоһуктарыгар маастара» үрдүк ааты Саргылана Ивановна Алексееваҕа туттарда.

Бу күн үөрүүтүн «Дорҕоон» этно-фольклорнай бөлөх (салайааччы Н.Ю. Корякина), «Кэрэли» үҥкүү бөлөҕө (салайааччы Ю.П. Федорова), Нина Иннокентьевна Протопопова аатынан Кэскил» оҕо айар-тобулар, дьоҕурун сайыннарар Киинин «Симэх» муода тыйаатыра. (салайааччы А.И. Гаврильева) киэргэттилэр.
Уус Кыһата арыллыытын чэрчитинэн турбут улууспут уран тарбахтаахтарын оҥоһуктарын быыстапката дьон болҕомтотун тарта, олохтоох маастардар оҥоһуктарын атыыта тэрилиннэ. В.О. Каратаев аатынан Олоҥхо Дьиэтигэр маастар кылаастар ыытылыннылар.

Бүлүү уран иистээхтэрэ Сардаана Иннокентьевна Сыроватская көмүс сабынан быысыбайга, сахалыы симэххэ, Муза Николаевна Тетелева валяниеҕа, Феодосия Афанасьевна Григорьева сахалыы моойторугу тигиигэ, Сусанна Прокопьевна Семенова мааны саҕа оҥоһуутугар, түүлээҕи аттаран тигиигэ, Леонид Лямович Син- Хой туоһунан үлэҕэ, ыалдьыттартан Дмитрий Николаевич Колодезников керамикаҕа, Тамара Николаевна Жиркова сахалыы иискэ, Зинаида Евсеевна Павлова кылынан-сиэлинэн үлэҕэ маастар-кылаастары ыыттылар.

Кэлбит ыалдьыттар Норуот маастара, Удьуор уус Николай Николаевич Степанов, уһанар дьарыктаах Егор Петрович Федоров дьиэтээҕи мастарыскыайдарыгар сылдьан үлэлэрин-хамнастарын, айар үлэлэрин билистилэр.

Салгыы норуот маастардара уонна уран уустар кыттыылаах төгүрүк остуол, аһаҕас кэпсэтии ыытылынна. Кэлэр 2022 сылга инникитин туох, ханнык үлэлэр барыахтарын торумнастылар, былааннаатылар.

Ытык Бүлүүгэ аһыллыбыт Уус кыһата саргыта салалыннын, Бүлүүбүт уус дьонун айар-тутар, уһанар тускулара туругурдун, утумнара уһаатын!

86

Добавить комментарий

Ваш адрес email не будет опубликован.