Евдокия Булатова анал быыстапката арылынна!
Ыам ыйын 7 күнүгэр «Симэх» национальнай киинигэр үлэ бэтэрээнэ, Дьааҥы улууһун бочуоттаах олохтооҕо, Саха Өрөспүүбүлүкэтин норуотун маастара Евдокия Гаврильевна Булатова үбүлүөйдээх 90 сааһыгар анаммыт «Илии сылааһынан Кыайыыны кынаттаан» айар быыстапкатын арыллыыта буолан ааста!
Тэрээһиҥҥэ «Симэх» национальнай киин салайааччыта Яна Игнатьева, СӨ Ил Түмэн судаарыстыбаннай мунньаҕын старшай референа Муза Винокурова, СӨ хотугу аҕыйах ахсааннаах норуоттар ассоциацияларын секретаря Виктория Шумилова, Хаҥалас улууһун «Арчы» Норуот айымньытын киинин салайааччыта Лидия Харитонова, историческай наука кандидата, «Уран Иис» иистэнньэҥнэр түмсүүлэрин салайааччыта Светлана Петрова, норуот маастардара, аймах-билэ дьоно кыттыыны ыллылар.
Евдокия Гарвильевна төрүт уус-уран оҥоһуктары сөргүтүүгэ, сайыннарыыга, үгүс сыллаах сыралаах үлэтин иһин Ил Түмэн судаарыстыбаннай мунньаҕын Грамотатынан, «За верность Северу» мэдээлинэн, Хаҥалас улууһун уһанар-иистэнэр үгэстэрин сайыннарыыга тус кылаатын иһин «Хаҥалас улууһун норуотун маастара» анал бэлиэнэн наҕараадаланна.
Евдокия Гаврильевна кулун тутар 1 күнүгэр 1936 сыллаахха Уус Дьааны улууһугар Дьукаагир нэһилиэгэр Гаврил Иванович, Анастасия Ивановна Томскайдар дьиэ кэргэҥҥэ төрөөбүтэ. Евдокия 5 саастааҕар Аҕа дойду Улуу сэриитэ саҕаламмыта. Саха дьонугар ыарахан кэмнэри аҕалбыта, элбэх киһи дьылҕатын уларыппыта-алдьаппыта. Ол курдук, Саха сиригэр сэрии сылларыгар тыылга сүүһүнэн тыһыынча киһи күүһүн-күдэҕин аахсыбакка хам аччык сылдьан тоҥо-хата үлэлээбитэ. Сэрии саҕаланыаҕыттан Хоту Дойду оҕолоро куобах тириитин имитэн үтүлүк, кээнчэ тигэн уонна да атын көмөнү фроҥҥа ыыталлара. Хара сарсыардаттан киэһээҥҥэ диэри үлэлээн, үлэ ыараханын, этинэн-хаанынан саҥа улаатан эрэр кыыс онно дьэ билэр. Төһө да кыра оҕо буоллар сап хатара, тирии имитэрэ, иистэнэрэ.
Евдокия Гаврильевна Хаҥалас улууһун 2-с Дьөппөн нэһилиэгэр олорон нэһилиэк общественнай олоҕор кыттан, эбээлэр түмсүүлэрин тэрийэн үлэлэппитэ. Онно, баҕаран туран, элбэх нэһилиэк дьахталлара, эбээлэрэ сылдьан оҕолоругар сон, этэрбэс, түүлээх бэргэһэ тигэн махталлара улахан. Күөрдэм нэһилиэгэр кэлэн нэһилиэккэ сэргэхсийиини киллэрбитэ диэн олохтоохтор ахталлар. Иис эйгэтигэр Дьокуускай куоракка көһөн кэлэн Өрөспүүбүлүкэ уран тарбахтаах дьахталлар ааттарын арыйбыта. Кини үөрэппит кыргыттара «СӨ норуотун маастара», «Арассыыйа норуотун маастара» буола үүннүлэр.
Евдокия Гаврильевна саха уонна хотугу норуоттар уус-уран оҥоһуктарын үксэтиигэ үгүс кылаатын киллэрэр, билигин даҕаны эдэр ыччакка баай билиитин үллэстэн, үлэлии-хамсыы сылдьарыттан биһиги үөрэбит уонна киэн туттабыт.
Евдокия Гаврильевнаны анал быыстапката арыллыбытынан эҕэрдэлиибит! Чөл туругу, эйэҕэс сыһыаны, этэҥҥэ буолууну, дьолу уонна үтүөнү баҕарабыт!
Быыстапка ыам ыйын 17 күнүгэр диэри үлэлиир.
