Аарыктаах айаным түгэннэрэ
Бүгүн от ыйын 8 күнүгэр таалар налыы хонуулаах ытык Таатта алгыстаах сиригэр Ытык Күөлгэ ХII төгүлүн ыытыллар Баһылай Манчаары спорт национальнай көрүҥнэрин Спартакиадатын култуурнай программатын иһинэн саха норуотун киэн туттар тимир ууһа, бөлүһүөк Борис Неустроев-Мандар уус 80 сааһыгар анаммыт «Аарыктаах айаным түгэннэрэ» норуот уус-уран оҥоһуктарын быыстапка-дьаарбаҥката, «Таатталыы оҥоһук» улуус талба талааннах уус-уран оҥоһуктарын уулуссата аһылынна.
Үөрүүлээх тэрээһиҥҥэ анабыллаах алгыс тылын, баҕа санаатын саха норуотун киэн туттар ууһа, Саха Өрөспүүбүлүкэтин бочуоттаах олохтооҕо Борис Федорович Неустроев-Мандар уус бар дьоҥҥо тириэртэ. Саха Өрөспүүбүлүкэтин Ил Түмэн Государственнай Мунньах бэрэссэдээтэлин бастакы солбуйааччыта Александр Жирков Таатталар Мандар суруйууларын, ойууларын сурукка киллэрин диэн баҕа санаатын тириэртэ, норуот национальнай идеятын тула түмсүөҕүн диэн ыҥырда. Таатта улууһугар Олоҥхо ыһыаҕа ыытыллара наадалааҕын эттэ. Таатта улууһун баһылыгын бастакы солбуйааччы Руслан Захаров Чуруков Григорий Васильевичка «Таатта улууһун норуотун маастара» анал бэлиэни туттарда.
«Симэх» норуот уус-уран оҥоһуктарын уонна ускуустубатын национальнай киинин дириэктэрэ Яна Игнатьева норуот маастардарын айар түһүлгэлэрэ төрүттэммит үөрүүлээх күнүнэн истиҥник эҕэрдэлээтэ. Уус-уран оҥоһуктары сайыннарыыга, өбүгэ уһанар, иистэнэр үгэстэрин сөргүтүүгэ айымньылаах үлэлэрин иһин «Саха Өрөспүүбүлүкэтин уус-уран оҥоһуктарын маастара» үрдүк анал бэлиэни Лидия Ивановна Евграфоваҕа, Марат Васильевич Лопатиҥҥа туттарда. «Таатта» улуустааҕы норуот айымньытын дьиэтин дириэктэрэ Гаврил Вырдылин Тааттаҕа Олоҥхо ыһыаҕа ыытыллара наадалааҕын бэлиэтээтэ. Таатта уус-уран оҥоһуктарын түһүлгэтэ саха балаҕанын быһыытынан олус тупсаҕайдык, бөҕөтүк-таҕатык оҥоһуллубут.
Улуус нэһилиэктэриттэн бииртэн биир тупсаҕай, хараҕы сымнатар норуот талба талааннаахтарын кэрэ оҥоһуктара атыыга таҕыстылар. Тимир уустарын, туой, кыл маастардарын оҥоһуктара, сиэдэрэй оһуордаах-мандардаах мас уустарын сахалыы сиэдэрэй оҥоһуктара, тайах, таба, мамонт муоһуттан кыһан оҥоһуллубут оҥоһуктар, хатыламмат кэрэ түгэни бэлэхтиир, норуот ис тыынын, кутун-сүрүн туппут Мандар уус уруһуйдара уо.д.а. атын санааны көтөҕөр сырдык үлэлэр бар дьон сэҥээриитин ыллылар. Талыы Таатта уһанар-иистэйгэтигэр эдэр ыччаттар киирбиттэрэ кэрэхсэбиллээх. Норуот талба талааннаахтарын түһүлгэтэ от ыйын 12 күнүгэр диэри эһигини күүтэр.
