Тааттаҕа Манчаары оонньуулара
Саха норуотун аар-саарга аатырдыбыт улуу дьоннор Өксөкүлээх Өлөксөй, Алампа, Николай Неустроев, Былатыан Ойуунускай, Амма Аччыгыйа, Суорун Омоллоон, Бэс Дьарааһын, Анна Егорова, Макар Хара, философскай наука доктора, профессор Авксентий Мординов уо.д.а. күн сирин көрбүт ытык сирдэригэр, үс саха кутун-сүрүн өллөйдөөбүт, сээркээн сэһэнньиттэрдээх, аар-саарга аатырбыт улуу олоҥхоһуттардаах, таалар налыы хонуулаах талыы талба Таатта киинигэр Ытык Күөлгэ от ыйын 8 күнүгэр XXII төгүлүн ыытыллар спорт национальнай көрүҥнэригэр Баһылай Манчаары Спартакиадатын үөрүүлээх аһыллыыта ыытылынна.
Илгэлээх сылаас тыыннаах, айар куту тургурдар ытык Таатта сиригэр Саха сирин улуустарыттан тыһыынчанан киһи тоҕуоруһа муһунна. Манчаары ооньууларын аһыллар церемонията прологтан, «Моҕол ураһа» элбэх дьон кыттыылаах үҥкүүттэн саҕаланна.
Саха Өрөспүүбүлүкэтин Правительствотын бэрэссэдээтэлин солбуйааччы, тэрийэр комитет бэрэссэдээтэлэ Сергей Местников Таатта XXII төгүлүн ыытыллар спорт национальнай көрүҥнэригэр Баһылай Манчаары Спартакиадатын ыытарга бэлэмин туһунан рапорт оҥордо.
Саха Өрөспүүбүлүкэтин Ил Дархана Айсен Николаев эҕэрдэ тылыгар Манчаары оонньуулара норуот кутун-сүрүн бөҕөргөтөргө, үйэлээх үгэстэрин тыыннаах хаалларарга, спорт национальнай көрүҥнэрин кэнчээри ыччакка тэнитэргэ, чэгиэн туругу, чөл олоҕу туругурдар далааһыннаах, улахан таһымнаах тэрээһин буоларын бэлиэтээтэ. Балтараа тыһыынчаттан тахса спортсменнар күрэхтэһиэхтэрэ. Спартакиада иһинэн ыытыллар араас хабааннаах тэрээһиннэргэ кытта сэттэ тыһыынчаттан тахса дьон үлэлии кэлбиттэр.
Ил Дархаммыт Таатта улууһун бар дьонугар, олохтоохторугар Манчаары оонньууларын үрдүк таһымҥа ыытарга сыралаах үлэлэрин иһин истиҥ махтал тылларын эттэ.
Мустубут дьону Киргизия Өрөспүүбүлүкэтин Министрдэрин кабинетын бэрэссэдээтэлин солбуйааччыта Эдиль Байсалов, Российскай Федерация спортка Министерствотын физическай култуураҕа уонна массовай спортка департаменын директора Максим Уразов, Таатта улууһун баһылыга Айаал Бурцев эҕэрдэлээтилэр.
«Дьулуруйар Ньургун Боотур» стадиоҥҥа Оонньуулар былаахтара күөрэччи көтөҕүлүннэ. Саха сирин хапсаҕайга спордун маастарыгар, Саха Сирин норуоттарын спортивнай оонньууларын көҥүл тустууга икки төгүллээх чемпионугар, Манчаары оонньууларын чемпионугар, призеругар Игнат Андросовка Манчаары оонньууларын уотун уматар үрдүк итэҕэл сүктэрилиннэ.
«Кыайыыга уон биир үрдэл» театрализованнай дьүһүйүү сахалыы тыыннаахтык, ытык Таатта туһунан өйдөбүлү дьоҥҥо-сэргэҕэ тиийэр, өйдөнөр гына көрдөрүлүннэ. Орто туруу бараан аан ийэ дойду алгыстаах туонатыгар киһи буолан килбэй, саха буолан сандаар, ай-тут, кэрэҕэ дьулус, ийэ тылгын, төрүт үгэстэргин умнума диэн ис хоһоонноох уус-уран дьүһүйүү буолла.
Элбэх уол оҕо, эр дьон кыттыбыта, таҥас-сап мааныта, декорациялар хатыламмат сырдык тыыннара, уот-күөс эгэлгэтэ, тыас-уус кэрэтэ биир күдьүс айымньы буолан көһүннэ. Аллараа дойду арбаҕастаахтарын наһаа өрө туппакка, умса анньан, өһөрөн Айыы сиригэр алгыс олохсуйар, сырдык күүс баһыйарын көрдөрбүттэрэ астыннарда.
Өрөспүүбүлүкэтээҕи тэрийэр кэмитиэт анал быһаарыытынан билиэт атыылаһан киирбит национальнай таҥастаах дьиэ-кэргэттэр ортолоругар күрэх ыытылынна. Герасимова Алина Игорьевна, «Айыы кыһата» национальнай гимназия педагога, Степанова Марианна Вячеславовна, «Таатта» улуустааҕы норуот айымньытын дьиэтин дириэктэрин солбуйааччыта, Саха Өрөспүүбүлүкэтин култууратын үтүөлээх үлэһитэ, Осипов Дмитрий Константинович, Саха Өрөспүүбүлүкэтин «Симэх» норуот ускуустубатын уонна уус-уран оҥоһуктарын Национальнай Киинин норуот уус-уран оҥоһуктарын сайыннарар ресурснай киинин салайааччыта, Саха Өрөспүүбүлүкэтин култууратын туйгуна састааптаах жюри быһаарыытынан национальнай таҥастаах дьиэ-кэргэн аатын үс оҕолоох Варвара, Мичил Боппосовтар ыланнар «Уруу» ювелирнай фирма олохтообут дьиэ-кэргэҥҥэ аналлаах үрүҥ көмүс сиэдэрэй симэҕин комплегынан наҕараадаланнылар.
Аһыллыы үөрүүлээх церемонията «Манчаары оонньуулара» ырыанан Тааталыы оһуохайынан түмүктэннэ.
