“Истиҥ, иһирэх тылынан” кинигэ сүрэхтэниитэ
Балаҕан ыйын 13 күнүгэр Чурапчы улууһугар «Айылгы» норуот айымньытын дьиэтигэр ССРС култууратын туйгуна, СӨ култууратын үтүөлээх үлэһитэ, РФ Суруналыыстарын сойууһун чилиэнэ, Чурапчы улууһун уонна Болугур нэһилиэгин Бочуоттаах олохтооҕо, «Гражданскай килбиэн» бэлиэ хаһаайката, Чурапчы улууһун култууратын сайдыытыгар сүҥкэн кылааттаах Валентина Дмитриевна Пинигина төрөөбүтэ 80 сылын көрсө киниэхэ анаммыт «Валентина Пинигина. Истиҥ, иһирэх тылынан…» диэн кинигэ сүрэхтэниитэ ыытылынна.
Дьоро күҥҥэ Валентина Дмитриевна дьиэ кэргэнэ, аймахтара, бииргэ үлэлээбит үөлээннээхтэрэ, уһуйан таһаарбыт ыччаттара, улуус, нэһилиэктэр салалталара, култуура эйгэтин үлэһиттэрэ муһуннулар. Манна кэлбит хас биирдии киһи ахтыылары хомуйан, сааһылаан кинигэ оҥорон таһаарбыт Айталина Михайловнаҕа, бэйэтин издательствотыгар таҥан бэчээккэ ыыппыт Борис Ивановичка ис сүрэхтэриттэн махтаннылар уонна истиҥник, иһирэхтик, сылаас тылларынан Валентина Дмитриевнаны аҕыннылар.
Валентина Дмитриевна норуот култууратын, духуобунай баайын, уус-уран нэһилиэстибэтин, көлүөнэттэн көлүөнэ5э быстыспат ситимнэнэн кэлбитигэр бэйэтин сүҥкэн кылаатын киллэрбит киһи буолар. Улууска култуура сайдыытыгар, дьиэ кэргэн туруктаах буолуутугар, норуот талааннаахтарын уус-уран оноһуктарын пропагандалааһынна элбэх үлэни ыыппыта.
өбүгэ төрүт дьарыктарын утумнааһыны тар5атыыга киэн далааһыннаах үлэни тэрийбитэ. “Айылгы” култуура киинигэр норуот маастардарын тумэн “Ай” студияны салайбыта. Лаборатория тэрийэн, семинардары, лекторийдары онорон, улахан быыстапкаларга, дьаарбанкаларга кыттан 1989 сыллаахха “Ай” студия норуодунай ааты ылбыта.
Валентина Дмитриевна сүтэн эрэр саха омук биир былыргы дьарыгын- кылтан-сиэлтэн өрүүнү сөргөхсүтүүгэ үлэлэспитэ. Улуус далбар хотуннарын, кэрэ аҥардарын түмэн олоххо киллэрбитэ. Билигин Чурапчы улууһа республика5а кыл-сиэл оҥоһуктарга бастыннар ахсааннарыгар киирэрин ситиспитэ. Ону таһынан, ыһыах иһитин-хомуоһун үөрэтиинэн, түмүүнэн, оноруунан дьарыктаммыта. Билигин Чурапчы улууһун 17 нэһилиэгэр толору ыһыахха “кымыс үрдүн охторуу” сиэрин-туомун иһитэ-хомуоһа баар буолары ситистилэр. Ол туһунан “Ай” норуодунай студия салайааччыта Сусанна Дьячковская иһитиннэрдэ.
Валентина Дмитриевна – саха норуотун патриота, туруу улэһит, ирдэбиллээх салайааччы, үтүө сүбэһит, тапталлаах кэргэн, киэн аймах тумус туттар киһилэрэ. “Истин, иьирэх тылынан” кинигэ ону бигэргэтэр гына табыллыбыт.
