Каролина Парфенова “Айар аартыктарым» анал быыстапкатын арылыыта
Бэс ыйын 14 күнүгэр, айылҕаттан айдарыылаах, тарбаҕар талааннаах, ураты дьоҕурдаах, Саха сирин сыахай оҥорооччуларын союһун чилиэнэ, Саха Өрөспүүбүлүкэтин норуотун маастара Каролина Петровна Парфенова 60 сааһын бэлиэтиир “Айар аартыктарым» анал быыстапкатын үөрүүлээх арылыыта буолан ааста.
Каролина Петровна Олунньу ый 11 күнүгэр 1964 сыллаахха Сунтаар оройуонун иккис Дьаархан (билигин Маар-Күөл) бөhүөлэгэр, Терентьевтар диэн элбэх о5олоох дьиэ-кэргэҥҥэ төрдүс о5оннон күн сирин көрбүтэ. Төрөппүттэрэ айар дьоҕурдаах, тарбахтарыгар талааннаах, кэрэни кэрэхсии көрөр дьон буолан иис абылаҥар Каролина Петровнаны төрөппүт ийэтэ Анна Даниловна кыһыҥҥы таҥас тигэригэр тирии имиттэрэн иис кэрэ эйгэтигэр угуйан саҕалаабыта. 1980 сыллаахха орто оскуоланы бүтэрэн баран, Ленинград куоракка гранильщик үөрэҕин бүтэрэн, дойдутугар эргиллэн кэлэн идэтинэн үлэлээн саҕалаабыта. Ол курдук 2001 сыллаахтан Хаҥалас улууһун Покровскай куорат гранильнай собуотугар огранщигынан үлэлии кэлэн, Хаҥалас улууһун сирин-уотун, дьонун-сэргэтин сөбүлээн иккис дойду оҥостон олохсуйа хаалбыта.
Бочуоттаах сынньалаҥҥа олорор кэмигэр куукуланнан умсугуйан туран дьаныардаахтык дьарыктанан саҕалаабыта быйыл номнуо 10 сылын туолла. Каролина Парфенова айар үлэлэрэ үгүс дьон сэҥээриитин ылар, ол курдук кини үлэлэрэ хас да төгүллээх Өрөспүүбүлүкэ, Арассыыйа, аан дойду таһымнаах кыайыылааҕа.
Каролина Петровна сыахайга сүрүн үлэтинэн буолар Василий Семенович Яковлев – Далан Тыгын Дархан арамааныгар олоҕуран оҥоһуллубут коллекция буолар. Бэйэтин тула талааннаах дьону муһан бу улахан проегы олоххо киллэрбитэ. Айар үлэтин тухары сүүһүнэн үөрэнээччилэнэн, кэрэ эйгэҕэ элбэх киһини угуйа сылдьар.
Үөрүүлээх арыллыыга СӨ култуураҕа уонна духуобунай сайдыыга миниистирэ Афанасий Ноев, Хаҥалас улууһун Аҕа баһылыгын солбуйааччыта Юрий Никифоров, Хаҥалас улууһун култуураҕа управлениетын начальнига Фекла Варламова, Саха сирин сыахай оҥорооччуларын союһун бэрэссэдээтэлэ Айталина Иванова, биир үөлээннээхтэрэ, аймах-билэ дьоно кыттыыны ыллылар.
Каролина Петровнаны “Айар аартыктарым” үбүлүөйдээх анал быыстапката арыллыбытынан өссө төгүл эҕэрдэлиибин! Айар үлэтигэр ситиһиини, чэгиэн-чэбдик оло5у, дьолу, тапталы ба5арабыт !
Быыстапка бэс ыйын 14 күнүттэн – от ыйын 7 күнүгэр дылы үлэлиир.
Буолар сирэ: Өксөкүлээх аатынан норуоттар доҕордоһууларын дьиэтэ.
Кирии билиэт сыаната: 200 солк.
