Мэҥэ Уус
Бүгүн муус устар 4 күнүгэр үгэскэ кубулуйбут тохсус төгүлүн «Мэҥэ Уус» быыстапка-дьаарбаҥка бэрт тэрээһиннээхтик ыытылынна.
Быыстапка-дьаарбаҥкаҕа 9 көрүҥүнэн барыта 400-тахса уус-уран үлэлэр көрдөрүүгэ турдулар. Сыллата «Мэҥэ Уус» быыстапка-дьаарбаҥка саҥа ааттары, үлэлэри бар дьоҥҥо билиһиннэрэр. Туостан, кылтан, мастан норуот талааннаахтарын тупсаҕай үлэлэрэ дьон сэҥээритин ыллылар. Туой оҥоһуктар, сыахай оҥоруута, тимир уустарын эгэлгэ үлэлэрэ дьон болҕомтотун тартылар. Сахалыы иистэнии, кыбытыылаах тигии таһымнара сайдан иһэллэрэ харахха быраҕыллар.
«Симэх» норуот ускуустубатын уонна уус-уран оҥоһуктарын Национальнай киинин үлэһиттэрэ Дора Адамова уонна Дмитрий Осипов «Мэҥэ Уус» уус быыстапка-дьаарбаҥка дьүүллүүр сүбэтигэр үлэлээтилэр.
«Мэҥэ Уус» уус быыстапка-дьаарбаҥка кыттыылаахтарын Саха Өрөспүүбүлүкэтин Ил Түмэн Государственнай мунньах сир сыһыаннаһыытыгар, айылҕа ресурсатыгар уонна экологияҕа сис кэмитиэтин бэрэссэдээтэлэ А.М.Находкин, Мэҥэ-Хаҥалас улууһун баһылыгын солбуйаччыта В.В.Филиппов, «Симэх» норуот ускуустубатын уонна уус-уран оҥоһуктарын Национальнай киин ресурснай киинин салайааччыта Д.К.Осипов, Мэҥэ-Хаҥалас улууһун культуратын управлениетын начальнига А.Р.Исакова, Г.Г.Колесов аатынан Олоҥхо дьиэтин дириэктэрэ Е.Н.Иванова эҕэрдэлээтилэр, наҕараадалары туттардылар.
Өр сыллаах, айымньылаах, үтүө түмүктэрдээх үлэтин иһин «Саха Өрөспүүбүлүкэтин норуот ускуустубатын иннигэр үтүөлэрин иһин» «Симэх» Национальнай Киин анал бэлиэтинэн Гаврил Колесов аатынан Олоҥхо дьиэтин дириэктэрэ Евдокия Иванова наҕараадаланна. Иистэнэр дьарыгы сайыннарыыга айымньылаах, таһаарыылаах үлэлэрин иһин «Саха Өрөспүүбүлүкэтин уус-уран оҥоһуктарга норуотун маастара» үрдүк аат иҥэриллиннэ Дьячковская Варвара Николаевнаҕа, Федорова Евдокия Ивановнаҕа.
Бу күн уонтан тахса киһиэхэ Мэҥэ-Хаҥалас улууһун норуотун маастара аат иҥэрилиннэ. «Мэҥэ Уус» үрдүк аат, үрүҥ көмүс бэлиэ уонна харчынан бириэмийэ туттарылынна Баишев Николай Семеновичка. А.П.Скрябина аатынан үрүҥ көмүс бэлиэ харчынан бириэмийэ туттарылынна Баишева Александра Семеновнаҕа. Мэҥэ-Хаҥалас улууһун «Дархан Уус» анал бэлиэ Федор Скрябиҥҥа, Александра Артемьеваҕа, Анастасия Васильеваҕа, Устин Борисовка, Александра Портнягинаҕа туттарылыннылар.
