Симэх

Национальный центр народного прикладного искусства и художественных промыслов

Новости

Дьокуускай куоракка норуот уус-уран оҥоһуктарын маастара Надежда Иванова айар быыстапкатын арыйда

Сэтинньи ый 16 күнүгэр, доруобуйа харыстабылын бочуоттаах үлэһитин, доруобуйа харыстабылын туйгунун, «Горнай улууһугар сайдыытын кылаатын иһин» бэлиэ хаһаайкатын, Саха сирин дьахталларын XIII съеһын делегатын, үлэ бэтэрээнин, Саха Өрөспүүбүлүкэтин норуот уус-уран оҥоһуктарын маастарын, «Волшебный клубок» куруһуок, «Надежда» муода студиятын салайааччытын Иванова Надежда Афанасьевна «Волшебной клубок» диэн айар быыстапката «Симэх» национальнай киинин «Арт-салонугар» арылынна.

Айылҕаттан бэриллибит талба талаанын сөпкө тайанан, олох кэрэ оһуорун сапка тиһэн ыллатар дьикти, кэрэ талааннаах Надежда Афанасьевна Иванова Саха Өрөспүүбүлүкэтигэр Ийэ сылыгар анаммыт “Волшебный клубок Надежды” диэн анал быыстапкатын арыйар аалай лиэнтэни быстылар: «Симэх» норуот искусствотын уонна уус-уран оҥоһуктарын национальнай киинин салайааччыта Яна Викторовна Игнатьева, «Семен уонна Софрон Даниловтар ааттарынан Духуобунас киинин» директора Александра Владимировна Алексеева уонна быыстапка хаһаайката Надежда Афанасьевна Иванова.

Надежда Афанасьевна Сахабыт сиригэр уһун кыһын кэнниттэн кубулҕаттаах кулун тутар ый 2 күнүгэр, саха омук итэҕэлинэн 9 Айыыттан, 3 халлааҥҥа олохсуйбут, идэни, күүһү, үлэлиир дьоҕуру билгэлиир Дьөһөгөй Айыы ыйыгар, Өлүөхумэ улууһун Кыыллаах нэһилиэгэр Анна Ильинична уонна Афанасий Прокопьевич Корниловтар элбэх оҕолоох дьиэ кэргэҥҥэ иккис оҕонон күн сирин көрбүт.


Оҕо эрдэҕинээҕи баҕа санаатын толорон, баҕарбыт идэтигэр, медсестралары бэлэмниир кууруска киирэн үөрэнэн, 1978 сыллаахтан Горнайдааҕы киин балыыһаҕа сиэстэрэнэн, 1989 сыллаахха Алданнааҕы медицина колледжын бүтэриэҕиттэн Бэрдьигэстээх улуустааҕы киин балыыһатыгар акушерканан күн бүгүнүгэр диэри үлэлии сылдьар. Бу үлэлиирин тухары элбэх оҕону ийэлии сылаас илиитинэн бигээн орто дойдуга күн сирин көрдөрбүтэ. Бэйэтэ этэринэн “Идэбин олус сөпкө талан, кырачаан киһи мин илиибэр түһэн кэлэриттэн долгуйабын, үөрэбин уонна бэйэбин дьоллооҕунан ааҕынабын” — диэн үлэтин сөбүлүүрүн өссө биирдэ чопчулуур.

Төрөөбүт ыйын Дьөһөгөй Айыыһыт билгэтинэн Надежда Афанасьевна туруу үлэһит, тарбаҕар бэриллибит талба талаанын сайыннаран 1970 сыллаахтан ириис сабыннан баайыынан үлүһүйэн туран дьарыктанар. Бастакы айар быыстапката 2003 сыллаахха Бэрдьигэстээҕи кыраайы үөрэтэр музейга турбут. 2005 сыллаахха Дьокуускай куоракка Өксөкүлээх Өлөксөй аатынан Култуура дьиэтигэр “Симэх” норуот оҥоһуктарын уус-уран галереятыгар, 2009 “Ийэҕэ махтал” диэн ааттананан уонна 2011 сыллаахха Надежда Афанасьевна төрөөбүт дойдутугар Өлүөхумэ улууһун Кыыллаах нэһилиэгэр, Дьокуускай куоракка “Туйаара” атыы-эргиэн киинигэр турбуттар. Маны таһынан сылын аайы ыытыллар араас таһымнаах быыстапкаларга үлэтин туруоран дьон сэҥээриитин өрүү ылар.

«Маастар быһыытынан бастатан туран норуокка анаан үлэлиир, бэйэтин сатабылыгар дьону үөрэтэр буоллаҕына бу дьиннээх норуот маастара диэн буолар» — диир Надежда Афанасьевна. Сахалыы моһуоннаах сону аан маҥнай кини баайан саҕалаабыта, онтон атыттар иилэ хабан ылан билигин стилизованнай сахалыы сону баайар дьон аҕыйаҕа суох.

Надежда Афанасьевна биһиктэнэн улааппыт сириттэн төһө да тэйиччи олордор сылын аайы дойдутугар Өлүөхүмэ улууһун ырыаҕа ылланар Кыыллаах нэһилиэгэр баран ыраас салгынын тыынан санаалыын сынньанан, дууһалыын дуоһуйан кэлэр. Төрөөбүт дойдутун кэрэ айылҕатын, үтүө-мааны дьонун сэргэтин алгыһын сабыгар тиһэн оһуор гынан таһааран бар дьонугар аныыр.

«Ыччакка кэскилэ түстэнэр» — диэн Надежда олоҕун, үлэтин туһунан туоһулуур олус сөп түбэһэр тыллардаах хоһоонунан “Волшебный клубок Надежды” диэн анал быыстапкабытын арыйда.

Быыстапка үлэлиир кэмэ:

Сэтинньи ый 16-25 күннэрэ

10:00-17:00 ч.

Киирии билиэт сыаната: 100 солк.

Сэтинньи ый 17 күнүгэр, күнүс 14:00 чааска Дьокуускай куорат олохтоохторугар «Күрүчүөгүнэн баайыы ньымалара» маастар кылаас буолар.

442

Добавить комментарий

Ваш адрес email не будет опубликован. Обязательные поля помечены *