Өрөгөй чорооно
Бүгүн кулун тутар 5 күнүгэр Саха сирин норуотун маастарыгар аналлаах 15 төгүлүн ыытыллар «Уһанар-айар Саха сирэ» (Якутия мастеровая) быыстапка-дьаарбаҥка иһинэн ыытыллар идэ таһымын үрдэтэр «Өрөгөй чорооно» күрэх Дьокуускай куорат «Арчы» духуобунас дьиэтигэр саҕаланна.
Күрэххэ Таатта, Горнай, Нам, Үөһээ Бүлүү, Сунтаар, Хаҥалас улуустарыттан, Мииринэй оройуонуттан, Дьоккуускай куораттан 14 киһи кытта сылдьаллар. Ол курдук 4 кэрэ аҥар, инники кэскиллэрбит Петр Романов аатынан Дьокуускайдааҕы ойуулуур-дьүһүннүүр училище (колледж) студеннараАнжелика Данилова, Любовь Ильина, Нам орто оскуолатын 7 кылааһын үөрэнээччитэ Айхал Васильев уо.д.а. эдэр дьон кытталлар.
Күрэх сүрүн тэрийээччитэ «Симэх» Национальнай Киин ресурснай киинин салайааччыта, Саха Өрөспүүбүлүкэтин маһынан уһанааччыларын общественнай түмсүүтүн салайаччыта Дмитрий Осипов этэринэн маннык идэни үрдэтэр күрэхтэр сыл аайы норуот маастарын күнүгэр анаан ыытыллаллар.
2023 сыллаахха «Хамыйахттах, кытыйа», 2024 сыллаахха «Көҥкөлөй. Удьаа», быйыл Кыайыы 80 сылынан «Өрөгөй чорооно» күрэх буола турар. Кыттааччылар икки күн устата 30 см үрдүктээх илиинэн хаһан оҥорон аҕалбыт чорооннорун иилээн, оһуордаан-мандардаан, арыылаан-оҕунуохтаан силигэ сиппит чороону оҥорон таһаарыахтаахтар.
Үс бастакы миэстэни ылбыт чорооннор Симэх норуот ускуустубатын уонна уус-уран оҥоһуктарын национальнай киинин эталоннай фондатыгар киириэхтэрэ. Күрэх түмүгэ кулун тутар 7 күнүгэр тахсыаҕа.
Людмила Кривошапкина, Петр Романов аатынан Дьокуускайдааҕы ойуулуур-дьүһүннүүр училище (колледж) декоративно-прикладной ускуустуба уонна уус-уран оҥоһуктарын отделениетын 1 курсун устудьуона, «Өрөгөй чорооно» күрэх волонтера.
Дмитрий Осипов, Анастасия Белолюбская, Людмила Кривошапкина хаартыскаҕа түһэриилэрэ
