Полина Николаевна Федорова иистэнэр дьарыга
Полина Николаевна Федорова Уус Алдан улууһун кэрэ айылҕалаах, түргэн сүүрүктээх Алдан эбэ хотун тардыытыгар сытар Түүлээх нэһилиэгэр 1956 сыллаахха төрөөбүтэ. Медучилищены бүтэрэн, сестра идэтин баһылаан дойдутугар тиийэн 3 сыл үлэлээбитэ. 1976 с. Саха государственнай университетин нуучча тылын факультетыгар киирбитэ. Нуучча тылын учууталын дипломнаах эдэр учуутал Хачыкаат оскуолатыгар оҕолору улуу нуучча тылыгар уһуйуутунан саҕалаабыта.
Онтон кэргэнин дойдутугар Сунтаарга тиийэн оҕолор уһуйааннарыгар иитээччинэн анаммыта. 1994 сылтан детсад сэбиэдиссэйинэн таһаарыылаахтык үлэлиир. 2000 сыллаахха уолаттарын үрдүк үөрэххэ киллэртээри дьоллоох Дьокуускай куоракка көһөн кэлбитэ.
Ийэтэ Копырина Марфа Васильевна араас дьэрэкээн оһуордары быысабайдыыра. Онно умсугуйан, ийэтин үүйэ тутан үөрэттэрбитэ. Улам илиитэ баран, үөрэнэн, санаата хотон аны таҥас тигэргэ холонор. Бастакы тигиитэ-балтыгар, бырааттарыгар, подругаларыгар маскарад тигитэлиир. Бастакы холонуу табыллан улам иискэ сыстан барар.
Уус илиилээх буолан 90-сылларга, бары-барыта кырыымчык кэмигэр дьиэ кэргэнин таҥаһынан тутаппатаҕа. Детсадка сылдьар уолаттарыгар бэйэтэ тигэн, оччотооҕу муодаттан хаалбат таҥастаах этилэр.
Сунтаарга олорон аймахтарыгар бэргэһэлэриттэн унтууларыгар тиийэ, таҥас арааһын тигэн абырыыра, махтал тылларын истэрэ. Ыал буолар балтыларыгар, подругаларын кыргыттарыгар таҥастарын тигэн сыбаайбаларын күнүгэр дьоллообутун ааҕан сиппэккин.
2015 с. Россия, Саха Өрөспүүбүлүкэтин норуотун маастара Дария Семеновна Козлова “Кырадаһын абылаҥа” айар түмсүүтүгэр киирэн саха омук таҥаһын быһыытын-таһаатын, тигэр ньыматын сөргүтүүгэ балачча үлэлэстэ, талаана арылынна. Ону таһынан оҕуруонан, кылынан оҥоһуктара дьон сэҥээриитин ылаллар. Ордук кыбытыктаах тигиини сайыннарыыга, тарҕатыыга утумнаахтык ылыста. Национальнай музей фондатыгар ХIХ үйэтээҕи ат симэҕин сөргүтэн, түмсүү далбардара илиилэрин сылааһын тиэрдэн бэлэхтээбиттэрэ. Ол үлэлэрэ Германия Лейпциг куорат музейыгар кэрэ экспонат буолан дьон кэрэхсэбилин тарда турар. Ол иһин республика дьонугар-сэргэтэтигэр көрдөрөөрү ол ат симэҕин тус бэйэтэ тигэн көрдөрүүгэ таһаарда. Дария Семеноновнаҕа уһуйуллан Чурапчы, Таатта, Мэҥэ Хаҥалас, Нам Хаҥалас улуустарыгар ыытыллыбыт быыстапкаларга ситиһиилээхтик кытынна. Ону таһынан куорат улахан музейдарыгар Национальнай ойуулуур-дьүһүннүүр, Музыка уонна фольклор музейдарыгар буолбут быыстапкаларга тиһигин быспакка кыттар. Куоракка ыытыллар тэрээһиннэргэ элбэхтик ыҥырыллар.
Историческэй наука кандидата, Саха Республикатын норуотун маастара Светлана Ивановна Петрова салайар “Уран иис” иис үрдүкү таһымнаах оскуолатыгар 3 сылын дьарыктанар.
Кэнники сылларга саха дьахтарын мааныга кэтэр кытыылаах сонун кэмпилиэгин тигиигэ ылсыһан үлэлиир. Ол чэрчитигэн 7 толору кэмпилиэк тигилиннэ (кытыылаах сон, дьабака, уостаах үтүлүк, өтттүк симэҕэ).
2019 сыллаахха Туймаада ыһыаҕын мааны таҥаһын күрэҕэр I миэстэни ылбыта. Пандемия кэмигэр 2020 сылга куйаар ситиминэн ыытыллыбыт саха кыһыҥҥы таҥаһын күрэҕэр I степэннээх лауреат буолбута.
2019 сылтан Дария Семеновналыын кыттыһан, иистэниэн баҕарар далбар хотуттары түмэн уус-иис ымпыгар-чымпыгар уһуйаллар. Үөрэнээччилэрэ балачча ситиһиилэннилэр. Бэйэлэригэр барсар сахалыы сон тиктэн харыс үрдээтилэр. Бэйэлэрин кыахтарын билинэн, күрэхтэргэ кыттан салайааччыларын үөрдэллэр.
Иис-уус айар үлэм быыстапкатын кэлэн сэргии, көрөргөр ыҥырабын.
А.Е. Кулаковская аатынан норуоттар доҕордоһууларын дьиэтэ, “Симэх” галерея.
Олунньу 19 күнэ, 15.00 ч.
