«Талба иис» түмсүү айар быыстапката
Бүгүн, ыам ыйын 20 күнүгэр, «Талба иис» түмсүү «Абылаҥнаах иис эйгэтигэр» диэн ааттаах быыстапка үөрүүлээх арыллыыта буолан ааста.
Түмсүү Саха Өрөспүүбүлүкэтин норуотун уус-уран оҥоһуктарын маастара Тамара Николаевна Жиркова салалтатынан номнуо 4 сыл үлэлиир. Түмсүү иистэниэҥ баҕалаах дьону түмэн 2022 сылтан дьарыктаан саҕалаабыта. Быыстапка 2022-2026 сс. үөрэх выпускниктарын айар үлэлэрин түмэр. Ол курдук, төрүт иис абылаҥар, кистэлэҥнэригэр уһуйуллан, бүгүҥҥү күҥҥэ 14 Далбар Хотун иис сүрүн ньымаларын, үөрэҕин баһылаатылар.
Үөрүүлээх арыллыыга «Симэх» норуот искусствотын уонна уус-уран оҥоһуктарын национальнай киинин Ресурснай салаатын салайааччыта Дмитрий Константинович Осипов эҕэрдэ тылын эттэ уонна үөрэнээччилэргэ туоһу суруктары туттарда.
Тамара Николаевна 4 сыллаах сыралаах үлэтинэн чочуллан, сыаналаах сүбэлэринэн салайыллан, тигиллэн, көрөөччү болҕомтотугар араас коллекциялар таҕыстылар, олор истэригэр: «Далбар Хотун» саха дьахтарын толору комплега, 19-с үйэтээҕи саха дьахтарын былааччыйалара, оноолоох соннор, сахалыы моһуоннаах көстүүмнэр, быысапканан киэргэтиилээх суумкалар, дьиэ кэргэн мааны таҥаһа: эр киһи камзола, баархаттан уонна пан-баархаттан тигиллибит былааччыйалар уо.д.а.
«Талба иис» түмсүү кыттыылаахтарыгар, уран тарбахтаах, таҥаска ураты оһуору-мандары туһэрэн симиир, мааны Далбардарга истиҥ эҕэрдэбитин тириэрдэбит! Саха төрүт ииһин үйэтитэ, тарҕата сылдьын диэн баҕа санаабытын аныыбыт!
Быыстапка чэрчитинэн ыам ыйын 21-27 күннэригэр маастар-кылаастар ыытыллаллар. Буолар сирэ: Дьокуускай куорат, Аржакова уул. 6 дьиэтэ, «Симэх» арт-салон. Б.т. 8924-763-98-40
