Татарстан сиригэр Сабантуй бырааһынньыгар саха норуотун уус-уран оҥоһуктарын быыстапката турда
Сахабыт сирин дириҥ силистээх-мутуктаах төрүт үгэспитин, баай култуурабытын, уран оҥоһуктарбытын, мындыр сатабылбытын көрдөрө, Татарстан өрөспүүбүлүкэтин Нижнекамск куоратыгар, Сабантуй+Ыһыах улахан тэрээһиннэригэр, СӨ Эпос уонна искусство киинин эпическай нэһилиэстибэ салаатын салайааччыта Евдокия Николаевна Иванова салайыытынан, кыттыыны ылан кэллибит.
Татарстан Өрөспүүбүлүкэтин Раис (аҕа баһылыга) Рустам Минниханов Ыһыах түһүлгэтигэр кэлэн ыалдьыттаата уонна уран уустар быыстапкаларын көрөн сөхтө, өссө сибээспитин бөҕөргөтөн хардарыта сыһыаннары олохтуохха диэн эттэ.
Бу быыстапкаҕа Саха сириттэн 7 улуустан (Сунтаар, Ньурба, Горнай, Амма, Мэҥэ Хаҥалас, Уус Алдан, Хаҥалас) Олоҥхо дьиэлэрин көҕүлээһиннэринэн 3 түмсүү, 25 маастар үлэлэрэ туран Татарстан дьонун-сэргэтин биһирэбилин ылла.
Быыстапкаҕа турда Хаҥалас улууһун Нөмүгү нэһилиэгиттэн «Ситим» түмсүү (сал. Игнатьева Д. С.) тирииттэн кымыс иһитин толору комплега, аас тэллэҕэ, тирииттэн лэпсэлэр, Игнатьева Ольга Михайловна сүөһү тириититтэн тикпит хотойдоох сон комплега, Уус Алдан улууһун Мүрү нэһилиэгиттэн «Мүрү оһуора» түмсүү (сал. Бочкарева Е. М.), Слепцова Елена Гаврильевна, Бурнашева Анна Афанасьевна, Иванова Евдокия Иннокентьевна, Горнай улууһуттан Христофорова Клара Дмитриевна кырадаһынтан тикпит паннолара, Уус Алдан улууһун Хоро нэһилиэгиттэн Петрова Мария Егоровна, Дүпсүн нэһилиэгиттэн Соловьева Пелагея Васильевна суҥ сөрүөлэрэ, Баатаҕай нэһилиэгиттэн Данилова Людмила Ивановна сылгы бас быалара, Найахы нэһилиэгиттэн Пестерева Маргарита Алексеевна сиэл сөрүөтэ, Лөгөй нэһилиэгин «Ураннар» түмсүү (сал. Копырина Е. Д.) «Ыйдар бэлиэлэрэ» сиэлтэн паннолара, Амма улууһун Эмис нэһилиэгиттэн Степанова Анастасия Степановна сиэл сөрүөтэ, ат толору симэҕэ, Уус Алдан улууһун Бээрийэ нэһилиэгиттэн Васильева Екатерина Николаевна туос иһиттэрэ, салама, Горнай улууһуттан Дьячковскай Валерий Моисеевич удьурхайтан олоҥхо геройдарынан «Дьулуруйар Ньургун Боотур» үлэлэрэ, Санникова Айталина Васильевна валяние ньыматынан оҥорбут паннолара, Даайа Моруот Хонооһой кыыһа туойунан араас сувенирдара, Ньурба улууһуттан Николаева Мария Пудовна ат симэҕэ, дэйбиирдэрэ, оҕо соно, Уус Алдан улууһун Мүрү нэһилиэгиттэн Бочкарева Екатерина Михайловна, Дегтярева Татьяна Гаврильевна ат толору симэхтэрэ, Дүпсүн нэһилиэгиттэн Босикова Александра Гаврильевна сарыы этэрбэстэрэ, сумкалара, Бороҕон нэһилиэгиттэн Габышева Анастасия Гаврильевна таба тыһыттан хотойдоох сон комплега, этэрбэһэ, Өлтөх нэһилиэгиттэн Местникова Мавра Петровна «Куорсун Ходоҕой» сукунаттан кэһиэччик коллекцията, Бурцев Мичил Николаевич чороонноро, Найахы нэһилиэгиттэн Сивцева Варвара Николаевна тирии хааһаҕа, 1 Өспөх нэһилиэгиттэн Гуляева Оксана Николаевна туой сувенирдара.
Икки күн устата бэйэлэрин сатабылларын билиһиннэрэ, тиэрдэ маастар кылаас биэрдилэр Иванова Евдокия Иннокентьевна тирии сэлиэччиктэри киэргэтиигэ, Санникова Айталина Васильевна (Горнай) валяниенан харысхал оҥоруутугар, Николаева Мария Пудовна (Ньурба) моойторук тигиитигэр, Игнатьева Дора Сидоровна, Игнатьева Ольга Романовна (Хаҥалас) сиэлтэн ымыы оҥоруутугар, Васильева Екатерина Николаевна (Уус Алдан) ситии хатан туос иһит тигиитигэр, Иванов Роман Яковлевич (Мэҥэ Хаҥалас) хомус, кырыымпа оҥоруутугар, Степанова Анастасия Степановна (Амма) кылтан, сиэлтэн өрүүгэ.
Саха сирин улахан кэнсиэригэр Евдокия Иванова (Уус Алдан) «Зов предков» тирииттэн сэлиэччиктэр коллекцията, Мавра Местникова (Уус Алдан) «Куорсун Ходоҕой» сукунаттан дьыл түөрт кэмин көрдөрөр сэлиэччик коллекцията, Ольга Игнатьева (Хаҥалас), Анастасия Габышева (Уус Алдан) Хотойдоох сонноро, Анжелика Иванова, Анастасия Степанова (Амма), Мария Николаева (Ньурба) бууктаах соннорун сценаҕа тахсан хааман көрдөрдүлэр.
Тимир уустара үгэс буолбут ньыманан тимир уһааран, Нижнекамск уонна Дьокуускай куорат салайааччылара оһохтон тахсыбыт болгуону тэҥҥэ эллээтилэр.
Маннык Татарстан өрөспүүбүлүкэтин Нижнекамск куоратыгар норуоттар доҕордоһууларын бигэргэтэн ыытыллыбыт Сабантуй+Ыһыах тэрээһин өйбүтүгэр-санаабытыгар үтүө өйдөбүл буолан хаалыа. Рахмат-Махтал тэрийээччилэргэ.
