Төрүт туос
Дьокуускайга “Симэх” арт-салон саалатыгар, Аржакова 6 дьиэтигэр, Нам улууһун Бастакы Хомустааҕар “Туос түһүлгэтэ” тэриллибитэ 25 сылыгар уонна норуот маастара Новгородова Марфа Иннокентьевна аатын үйэтитэн “Төрүт туос” түмсүү айар быыстапката үлэтин түмүктээтэ.
Уопсайа 138 улэ – 105 туостан иһиттэр, 9 салама (3,5,9 метр уһуннаахтар), 22 кылынан үлэ, 4 оҕуруолаах үлэ. Быыстапка чэрчитинэн: маастар кылаастар, семинар – “Симэх” фондатыгар көрсүһүү буоллулар.
Быыстапка үөрүүлээх сабыллыытыгар “Симэх” галерея директора, Игнатьева Яна Викторовна Марфа Иннокентьевна өбүгэ туос иһити тигии уустук үгэһин оҕолорго, улахан дьоҥҥо үөрэппитин утумнааччылар баалларын, үүнэн иһэллэрин бэлиэтээн эттэ.
Марфа Иннокентьевна бастакы үөрэнээччитэ Егорова Вера Прокопьевна кэлэн наһаа үчүгэйдик ахтан,санаан, махтанна.
Марфа Иннокентьевна балта, Бурнашева Анна Петровна, “Сайдыы” оҕо айымньытын дьиэтин директорыгар Винокурова Анастасия Николаевнаҕа, “Төрүт туос” түмсүү иистэнньэҥ кыргыттарыгар, үлэҕэ ситиһиилэри баҕаран туран улахан махталын тиэртэ.
Быыстапка этэҥҥэ түмүктэммитинэн, үөрэ – көтө махтанан, итии чэйдээх торт сиэн, астына кэпсэтэн тарҕастыбыт. Иннибитигэр, бэс ыйын 6 күнүгэр буолар “Туос түһүлгэтин” 25 сыла күүтэр.
Культура туйгуна, норуот уус – уран оҥоһуктарын маастара Ядреева Яна Петровна кэлэн бастакы кыыс хаппахчытын хайдах оҥорбутун, Марфа Иннокентьевна туһунан истиҥ иһирэх ахтыы оҥордо.
