Симэх

Национальный центр народного прикладного искусства и художественных промыслов

Новости

Тимофеев Павел Григорьевич

2022 сыл ахсынньы 11 күнүгэр биһиги кэккэбититтэн ураты талааннаах, уран тарбахтаах Саха Өрөспүүбүлүкэтин норуотун маастара, «Дархан уус» Бүлүү улууһун эрэ буолбакка бүтүн Өрөспүүбүлүкэ билинэр, ытыктыыр талааннаах киһитэ Тимофеев Павел Григорьевич күн сириттэн букатыннаахтык күрэннэ.

Үрдүк үөрэҕи бүтэриэҕиттэн оҕолору кэрэ эйгэтигэр үөрэтиигэ олоҕун анаабыта. Бүлүү улууһун үөрэҕин управлениетын начальнигын солбуйааччытынан, «Кэскил» оҕо сайдар киинин художник-оформителынан 2011 сыллаахха диэри айымньылаахтык үлэлээбитэ.

1 категориялаах эбии үөрэхтээһин педагога, Саха Өрөспүүбүлүкэтин үөрэҕириитин туйгуна. Павел Григорьевич чэпчэки куттаах-сүрдээх чорооннору, ыһыах иһитин-хомуоһун эт илиитинэн хаһан, чочуйан, оһуордаан-мандардаан ылбычча киһи тэҥнэспэт Айыы тыыннаах иһиттэрин-искусство кэрэ айымньыларын айан-тутан оҥорору сатыыр ураты дьоҕурдаах маастардартан биирдэстэрэ этэ.

Кини хамыйахтара, кытыйалара, чороонноро, көҥкөлөйдөрө өбүгэ ураты сылаас тыынын илдьэ сылдьар кэпсиир сэһэннээх. Этэр эйгэлээх, сылааһынан илгийэр дьикти тыыннаахтар. Мас ууһун таһынан кини Саха хомустарын оҥорооччу, ювелир быһыытынан биллэр. Кини хомустарынан аатырбыт импровизатор-хомусчуттар П.П.Оготоев, М.С.Бадаева, Х.Ф.Таскина, А.П.Евсеева, Бүлүү уонна Нам улуустарын үөрэнээччилэрин хомуска ансамбыллара оонньообуттара, оонньууллар дьон-сэргэ махталын ылыахтарын ылаллар. Кини өссө тимиртэн үлэҕэ туттуллар үҥүүлэри, саха быһахтарын, эр киһи курдарын, дьахтар киэргэллэрин-симэхтэрин сатабыллаахтык оҥорор этэ.

Павел Григорьевич Саха Өрөспүүбүлүкэтин спордун ветерана, V-c Манчаары оонньууларын кыайыылааҕа, «Бүлүү куоратын сайдыытыгар үтүөлэрин иhин» бэлиэ хаhaaйына, Бүлүү улууһун Бороҕон нэhилиэгин бочуоттаах олохтооҕо, Бороҕон нэhилиэгин «Уран ууhа».

✓ «Ремесла Якутии» региональнай быыстапка дипломана 2000 с Дьокуускай;
✓ Өрөспүүбүлүкэтээҕи Дьоккуускай куорат 370 сылыгар аналлаах быыстапка-дьаарбаҥка призера 2002 с;
✓ 2003 — 2006 с.с. улуустааҕы үөрэнээччилэр уонна учууталлар уус-уран оҥоһуктарын быыстапкаларын кыайыылааҕа;
✓ Бүлүү куорат 370 сылыгар ыытыллыбыт «Үрүҥ илгэ иһитэ» улуустааҕы конурска 1 степеннээх диплом, 2004 с;
✓ Бүлүү улууһун Улуу кыайыы 60-сылыгар аналлаах норуот уус-уран оҥоһуктарын быыстапкатын кыайыылааҕа, 2005 с;
✓ 2006 сылга Дьокуускай куоракка «Үрүҥ илгэ иһиттэрэ» персональнай быыстапката Бүлүү улууһун үөрэҕириитин 175-сылыгар ананан тэриллибитэ;
✓ 2006 с. Өрөспүүбүлүкэтээҕи «Чороон тойуга» конкурска «За лучшее сохранение традиций» номинация кыайыылааҕа;
✓ 2007 с Өрөспүүбүлүкэтээҕи норуот уус-уран оҥоһуктара быыстапка-дьаарбаҥка кыайыылааҕа;
✓ Саха сирэ Россия састаабыгар киирбитэ 375-сылыгар аналлаах Бүтүн республикатааҕы чороон оҥорооччуларын күрэҕин дипломана, 2007с;
✓ 2015 сыллаахха С.А.Зверев-Кыыл Уола 115 сааһыгар аналлаах «Уйгу чороон оһуора» республикатааҕы чороон оҥорооччуларын күрэҕин кыайыылааҕа Сунтаар нэһилиэгэ;
✓ 2022 сылга Үөһээ Бүлүүгэ ыытыллыбыт Олоҥхо ыһыаҕын «Сүллэр сөмүйэ сүллэрдээбит, дьаарай тарбах такайбыт, эриэккэс илии тикпит» “Мастан кыһан оҥоһуктар” номинация кыайыылааҕа;

Олоҕун былаһын тухары кэрэ эйгэтигэр бигэнэн Павел Григорьевич үгүс кэрэ оҥоһуктары айан, үгүс кэнчээри ыччаты абылаҥнаах эйгэҕэ уһуйбута, мындыр толкуйунан, кыраҕы хараҕынан хатыламмат дьикти айымньыларынан бар дьонун үөрдэн-көтүтэн, үрдүккэ, кэрэҕэ сирдээбит улахан маастар-үөрэтээччи, үтүө майгылаах киһи быһыытынан биһиги өйбүтүгэр-санаабытыгар, сүрэхпитигэр-быарбытыгар букатыннаахтык хаалыаҕа.

Дириҥ кутурҕаммытын кэргэнигэр, оҕолоругар, эдьиийдэригэр, чугас дьоҥҥоругар, аймахтарыгар, Бүлүү улууһун олохтоохторугар, Саха сирин бар дьонугар тиэрдэбит!

Төрөөбүт төрүт сирин буора сылаас сымнаҕас сыттык, көп суорҕан буоллун. Быдан дьылларга быраһаай биһиги ытыктыыр күндү киһибит!

«Симэх» норуот искусствотын уонна уус-уран оҥоһуктарын Национальнай Киинэ, Саха Өрөспүүбүлүкэтин ыһыах иһитин-хомуоһун оҥорооччуларын союһа

343

Добавить комментарий

Ваш адрес email не будет опубликован. Обязательные поля помечены *