“Удьуор Уус” быыстапка аанын арыйда!
Олунньу 5 күнүгэр Өксөкүлээх аатынан норуоттар доҕордоьууларын дьиэтигэр Бүлүү улууһун Балаҕаччы нэһилиэгиттэн төрүттээх Степановтар удьуор уустара бастакы хомуур быыстапкаларын, нэһилиэктэрэ төрүттэммитэ 250 сылыгар анаан арыйдылар.
Ытык Бүлүү сирэ-уота былыр-былыргыттан удьуор уус дьонунан биллэр. Онтон биирдэстэрэ Степановтар дьиэ кэргэн буолар. Хос хос эһэлэрэ Степанов Никифор Прокопьевич эмиэ дьоҥҥо ытыктанар, эргинэн атыылыыр, муҥхаһыт эбит. Степановтар дьиэ кэргэттэрэ сэттис көлүөнэ уус сыдьааннара. 12 о5олоох дьиэ кэргэнтэн убайдыы балыс Николай Николаевич уонна Анна Николаевна нэһилиэктэригэр бастыҥ маастардар. Саха төрүт үгэһин тимири уһаарыыны баһылаан, өрө тутан, Николай Николаевич саха хомуһун, быһаҕын сатабыллаахтык оҥорор. Ону таһынан скульптор, тимир, мас ууһун быһыытынан киэҥник биллэр.
Саха Өрөспүүбүлүкэтин норуотун маастара Анна Николаевна тикпит сахалыы төрүт таҥастара араас элбэх быыстапкаларга, күрэхтэргэ, фестивалларга көрбүт эрэ барыта хайгыыр, астына көрөр таҥастара.
Балтылара Саргылаана Ивановна сахалыы төрүт таҥаһы тигиинэн дьарыктанар.
Быыстапка үөруулээх арыллыытыгар Култуура уонна духуобунай сайдыы министиэристибэ муниципальнай тэрилиини кытта үлэлиир отдел салайааччыта Вера Афанасьевна Моисеева эҕэрдэ тыл эттэ уонна үрдук ситиһиилэри баҕарда.
Норуот уус-уран эйгэтигэр биллэр-көстөр дьон, сэҥээрээччилэр быыстапканы ахтыбыттыы то5уоруһа муһуннулар. Үөрүүлээх киэhээни опера уонна балет театрын солистката Мотрена Семенова, саха эстрадатын артыыстара Эрхан уонна Эрчим ылбаҕай ырыаларынан киэргэттилэр.
