«Ымыылаах ыал ыллыктара»
Балаҕан ыйын 20 күнүгэр И.Е.Винокуров аатынан Намнааҕы педагогическай колледж технологияҕа уһуйааччыта Саха Өрөспүүбүлүкэтин уус-уран оҥоһуктарга маастара Андрей Алексеевич, ойуулуур-дьүһүннүүр отделение уһуйааччыта, Саха Өрөспүүбүлүкэтин үөрэҕириитин туйгуна Елена Дмитриевна Осиповтар «Ымыылаах ыал ыллыктара» айар быыстапкалара колледж сырдык киэҥ уораҕайыгар үөрүүлээхтик аһылынна. Быыстапка Арассыйаҕа дьиэ кэргэн, Саха Сиригэр оҕо саас сылларыгар ананан тэрилиннэ.
Быыстапкаҕа эҕэрдэ тылларын эттилэр Нам улууһун олох-дьаһах боппуруостарыгар баһылыгын солбуйааччыта Юрий Вячеславович Дьяконов, Ленскай нэһилиэк муниципальнай тэриллии баһылыгын солбуйааччыта Тимофей Егорович Охлопков, Нам улууһун үөрэҕин салалтатын начальнигын солбуйааччыта Егор Иннокентьевич Бочонин, Нам улууһун культураҕа уонна духуобунай сайдыыга управлениетын начальнигын эбээһинэһин толорооччу, Саха Өрөспүүбүлүкэтин култууратын туйгуна Александра Николаевна Новгородова, Россия худуоһунньуктарын союһун чилиэнэ, Саха Өрөспүүбүлүкэтин үөрэҕириитин туйгуна Сергей Николаевич Колесов, “Симэх” норуот ускуустубатын уонна уус-уран оҥоһуктарын Национальнай Киинин уус-уран оҥоһуктары сайыннарар салаатын салайааччыта Осипов Дмитрий Константинович, норуот маастара, Саха Өрөспүүбүлүкэтин үтүөлээх учуутала, РСФСР үөрэҕириитин туйгуна Иннокентий Никитич Готовцев, Кыыл Уола аатынан үҥкүү Национальнай тыйаатырын «Кыл сахалар» ансаамбыл салайааччыта Анна Томская.
Быыстапкаҕа Елена Дмитриевна, Андрей Алексеевич хартыыналара, харандааһынан ойуулара, туостан, мастан оҥоһуктара, үөрэтэр-такайар оҕолорун үлэлэрэ көрдөрүүгэ турдулар, мустубут дьон сэҥээриитин ыллылар.
